Sowat 30 jaar gelede was daar 'n groepie studente aan die Normaalkollege in Pretoria wat so tussen die swot en meisies deur veel plesier gehad het aan die maak van musiek en sing. In daardie dae het hulle gehou van ou tranetrekkers wat groot byval gevind het en het ook hul eie sad liedjies geskep. ‘n Serenadegroep genaamd Die Grafsteensangers het so ontstaan.

Aan die einde van hul studies het die groep ontbind, maar hulle liedjies het in die harte bly leef. Een van die groot bewonderaars van die oorspronklike Grafsteensangers het hom in die groter Staatsdiens begeef waar hy mettertyd as parlementêre beampte aangewys is. Die parlementêre dorpie Akasiapark in die Kaap het 'n lewendige sosiale program gehad en koffiehuiskonserte was veral baie gewild. Daar het die Grafsteensangers herrys  - sonder enige van die oorspronklike lede - en die kern van die huidige groep het so twaalf jaar gelede in Akasiapark bymekaar gekom.

Die Grafsteensangers het in dié jare net so af en toe bymekaar gekom en op versoek is familie en vriende vermaak met droefsange, weenwysies en treurmares.

Gedurende 1999 het die Grafsteensangers die stoute skoene aangetrek en tydens Aardklop op Potchefstroom hulle vertoning aan die breër publiek bekendgestel en die reaksie was oorweldigend. Getrou aan hulle aard het die Grafsteensangers soos 'n groep troebadoere in ‘n 1940 Chevy lykswa genaamd Scrappie opgedaag, uitgeklim en gesing en daarna weer vertrek.

Die karakters het net voor Aardklop 1999 werklik beslag gekry. Tydens die bespreking oor wie en wat die groep moet wees, het een van die lede van die groep, Marie-Lee Venter, gesê sy is reeds 21 jaar 'n weduwee en sy kan niks anders wees nie. Vandaar dan dat die ander lede almal een of ander verbintenis met die Weduwee het.

So het die Weduwee se Suster, die Weduwee se Skoonsuster, die Weduwee se rowwe Broer en die ander karakters ontstaan. Wat begin het as 'n lekker naweek in Potchefstroom het sodanig uitgekring dat Die Grafsteensangers oor naweke selde tuis is. Versoeke vir optredes kom van alle uithoeke en dit is onmoontlik om aan almal te voldoen.

Die Grafsteensangers is verskeie kere op televisie gesien en hul derde CD en 'n vollengte video is onlangs vrygestel. Besoekers aan kunstefeeste is telkens gaande oor die groep en hulle het ook 'n suksesvolle internasionale debuut tydens Ukkasie 2001 in Londen gehad! Hulle het ook mettertyd hulle lykswa verruil vir ‘n moderner Chevrolet-bus genaamd Ou Ryperd, en dié rooi gevaarte is tans ‘n bekende landwye naweek-besoeker.

'n Lag-met-'n-traan of 'n traan-met-'n-lag - hoe u ookal die Grafsteensangers ervaar, hul lanfer-en-lag-vertoning sal u nie koud laat nie.

 

  
   
Daar is kopiereg op die kiekies, woorde, wysies en prentjies van hierdie whepsaait. Jy moet vra voordat jy dit misbruik of verkoop, anders meet ons jou!